Marilyn Monroe into 1959 into famôzo film "A qualcuno piace caldo"

Marilyn Monroe , nomme d'arte de Norma Jean (Jeane) Baker ò Mortenson (Los Angeles 1 zugno 1926, Santa Monica (Los Angeles) 5 agosto 1962).

Pe molti versci a figua inta quæ s'è concentrao tutte e contraddiçioin, e fantaxie, l'originalitæ, l'attraçion profonda, l'assolua fascinaçion che dan origine a-o mito cinematografego, quello punto de misteioso contatto into quæ a finçion, ossæ o personaggio costruio, o se fonde co-a realtæ ascosa, ben de spesso dolorosa, de un'individualitæ scingola, lasciando emerze di squarçi de sconcertante aotentiçitæ. Co-o so fascino estremmo e a-o contempo infantî, zugao in sce-o gusto de piaxei, costantemente exibio con conturbante sensualitæ, privo de ogni menaçça aggresciva e pervaso de fragilitæ e de insegueçe, a M. a dominò incontrastâ i sœunni e i dexidei sessuæ do pubbrico di anni çinquanta e di primmi anni sciuscianta, rappresentando l'inmaginaio erotico inte l'intrega gamma de negæ e prepotente pulscioin. Ma a so inmaggine, fissâ e riproposta inte de inallumieive foto de coertiña e inte di raffinæ serviççi fotograffeghi, da pœu consacrâ e serializzâ da Andy Warhol, complixi una vitta presentâ comme un feuilleton e tragicamente interrotta da una morte ingugeita into misteio, a l'ha aquixio un'immortalitæ mediatega ch'a prescinde da-i rolli e da-i film interpretæ, da-i registi che a diressan e da-i mæximi eventi che a segnon e a travozettan, e se basa in sce-a bellezza assolua da bionda diva da-o sguardo morbidamente languido e da-a complessa personalitæ ch'a l'appartegne ormai a ogni tempo.

Figgia de Gladys Monroe e de poæ ignotto (probabilmente Stanley Gifford, impiegao a-a Consolidated Film Industries comme Gladys, mentre Baker e Mortenson ean i cognommi rispettivamente do primmo e do segondo maio da donna), a l'arestò ben fîto priva de cue da moæ (ch'a fu internâ inte una clinica pe maotie mentæ) e a trascorse l'infançia e l'adolescença affidâ a de famigge adotive e, pe un periodo, a un orfanotrofio dove a se sentì poco amâ e infelixe. Una votta vegnua famosa a saiæ tornâ soventi, inte interviste rilasciæ, in sce questi eventi pe o ciu traomateghi (tra i quæ una violença subia da figgiœua) che, a-o de là de l'attendibilitæ do ricordo, rivelan solitudine e sperdimento. A-a riçerca de una stabilitæ affettiva a l'aççettò de sposâ into 1942 o zoeno meccanico Jim Dougherty e into 1944, mentre o maio o l'ea mainâ in goæra, a commençò a laoâ inte un stabilimento militâ dove se fabbricava paracheite. E foto che ghe fun scattæ da D. Conover, inviao pe realizzâ un serviçio in sce-e operaie, attion immediatamente l'attençion e a zoena a fu reclutâ da-a prestigiosa Blue Book Model Agency. Disciplinâ e decisa a assegondâ i suggeimenti de chi intendeiva valorizzâla attraverso l'obiettivo (comme o fotografo A. de Dienes), in breve a se propose co-a maiçiosa segueça da pin-up in grao de ezâtâ e a-o tempo mæximo superâ i limiti de l'inmaggine fissa provocando un clamoroso impatto in sce-o pubbrico. L'ea començao un periodo esâtante e diffiçile: into 1946 de fæto Norma Jean a l'ótègne o divorçio, un contratto co-a 20th Century-Fox, un nœuvo nomme (Marilyn Monroe) e, pe molti versci, una nœuva identitæ. Quella da bionda starlette da-a camminâ anchezante e flessoosa, da-o ton de voxe sussurrao e sexy. Mentre a l'affrontava i so primmi impegni cinematograffeghi (a commedia Scudda-hoo! Scudda-hay!, scioria solo into 1948, de F. Hugh Herbert, inta quæ a l'appâ de sfuzzia in te un'inquadratua; una piccena parte in Dangerous years, 1947, de Arthur Pierson), contemporaniamente a seguiva i corsci de tiatro presso l' Actors Lab de Los Angeles. Licençiâ da-a casa de produçion, graçie a l'interessamento do potente Joseph Schenk, cofondatô da Fox, a l'ótegne presso a Columbia Pictures una parte de rilevo into musical a basso costo Ladies of the chorus (1948; "Orchidea bionda") de Phil Karlson. Fu quindi l'agente cinematografego Johnny Hyde a faghe ótegnî di rolli ben ciu scignificativi doppo aveila notâ inte una breve ma sfolgorante appaiçion a-o scianco de Groucho Marx in Love happy (1949; "Una nœutte in sce-i teiti") de David Miller: dapprimma in The asphalt jungle (1950; "Giungla d'asfâto") de John Huston, quello de Angela, l'amante a un tempo provocante e infantî de un matúo avocáto scannapapê (Louis Calhern), e quindi quello inconsapeivemente aotoironnego de un'ambiçiosa attrixetta in All about Eve (1950; "Eva contra Eva") de Joseph L. Mankiewicz. I âtre peliccole do periodo pan invece imprexonâla into cliché da bionda vistosa e svampia, destinâ a suscitâ l'interesse di ommi ma ascì una veña de crudele sarcasmo, da-o quæ a parse liberase co-o bello personaggio de una zoena donna senscibile interpretao into 1952 pe a RKO into melodramma Clash by night ("A confescion da sciâ Doyle") de Fritz Lang. Quello mæximo anno se mortipricò i ócaxoin pe consolidâ o sempre ciu conscistente favô do pubbrico ormai infatuao da zoena promissa. Da un lao l'attrixe a s'impegnò a calibrâ e so doeutte dramattiche into confuso mélo da-i resvotti psicoanalitteghi Don't bother to knock ("A to bocca a bruxa") de Roy Ward Bake, e in The cop and the anthem de Henry Koste, episodio do collettivo O. Henry's full house ("A giostra umaña"), into quæ a disegna una sfrontâ prostituia. Da l'âtro a poette perfeçionâ o so innao talento commico in We're not married ("Maiezzi a sorpreiza") de Edmund Goulding, ma sorvetutto in Monkey business ("O magniffico scherço") de Howard Hawks, irrescistibile apoteoxi do so rollo de segretaia sexy. Into frattempo a moltiplicava i so sforçi pe perfeçionâse (a l'aveiva da-a rente, da-i tempi de Ladies of the chorus, una meistra de reçitaçion, Natasha Lytess), divorâ da l'anscia de cormâ i propri limiti corturæ.

Trasformao in pubbriçitæ l'improvviso scandalo caosao da-a diffuxon de foto de nuo che T. Kelley o gh'aveiva scattao into 1949 e ch'ean stæte doeuviæ pe o calendaio Golden dreams do 1950, a M. a se affermò definitivamente co-o personaggio pe lê anommalo de una dark lady in "Niagara" (1953) de Henry Hathaway: fasciâ in te 'n vestî rosso sciamma, sfacciâ e eccesciva mentre a s'abbandoña a-e notte da cançon Kiss ò quande a s'allontaña longo a stradda indulgendo inta so tipica andatua, inseguia da-a macchina da preisa inte una longa carrellâ. O successo o fu enorme ma a consacraçion assolua a doveiva arrivâ graçie a âtri doi film interpretæ into 1953 e inti quæ risurtan calibbræ inte un'estremma scintexi tutti i elementi che ciu ò meno confusamente aveivan caratterizzao i so precedenti personaggi: o brioso cinismo, a superfiçialitæ assolua, a calcolâ capitalizzaçion da propria bellezza in te una vosciua esaspiaçion comica destinâ a suscitâ into pubbrico un'indulgente sensaçion de superioritæ. Inta scintillante commedia da-i umoî taggenti Gentlemen prefer blondes ("I ommi preferiscian e bionde") de Hawks, vivaçizâ da di brillanti numeri muxicæ (in sce tutti Diamonds are a girl's best friend e Bye bye baby cantæ da-a M.), in sce de tæ caratteristeghe l'è costruio a biondiscima e rapaxe Lorelei, perfetta meitæ complementâ da giunonica, protettiva e bruña Dorothy (Jane Russell). O schema do film o se ripete ascì into ciu convençionâ How to marry a millionaire ("Comme maiâ un milionaio") diretto da Jean Negulesco, ch'o l'intreçça a stoia de træ amighe impegnæ inta riçerca do matrimonio economicamente risolutivo. Inte questo zœugo de stereotipi l'exile figua de gold digger da M. (a bellezza abarlugante da quæ a vegne celebrâ da-a çernia inusoâ pe una commedia de un formao comme o Cinemascope) a l'è costruia in sce-a blanda gag da miopia e do refúo di spegetti. Malgrao o rinnovao successo, o bezœugno da diva de confrontase con di rolli ciu stimolanti o se scontrò co-a reddenixe de Darryl F. Zanuck ch'o gh'impose de interpretâ l'anomalo western, da-i risvotti intimisti, River of no return (1954; "A magniffica preisa") de Otto Preminger into quæ o ghe feççe ripropoñe, inte un'infinia, calcolâ ripetiçion, a figua da ballæña, in questo caxo dominâ da di dexidei de rescatto e de maternitæ. A M. a no l'amò questo film e a refiò de giâ o succescivo Pink tights, mentre a l'açettò de pigiâ parte a-o musical Three's no business like show business (1954; "Matteie de l'anno") de Walter Lang into quæ a se propose inte un conturbante numero muxicâ, suscitando un noteive clamô. Into frattempo l'ea scciuppao o grande amô tra a star e l'introverso campion de baseball Joe DiMaggio. O maiezzo da cobbia, celebrao a-i iniçi do 1954, o fu inseio tra doi eventi de grande clamô pubbrico: o viægio in Giappon durante a luña d'amê co l'invio rivotto a-a M. a fâ una breve tappa in Corea pe intrattegnî e truppe e a famosa scena da metropolitaña de The seven year itch (1955; "Quande a moggê a l'è in vacança"), giâ da Billy Wilde into settembre do 1954, con l'aia ch'a boffava da-a grixella che, into sollevâghe e fádètte, a provocò un delirio inta folla presente e l'umiliaçion de DiMaggio, accelerando de fæto a fin do so ligamme. O film o stigmatizza e debolezze e i dexidei de l'american meddio, imprexonandolo tra de suggestioin metacinematografiche e o fascino de Marilyn, ciammâ a impersonâ The girl, a zoena sença nomme da-o forte e zugoso poei seduttivo, ma ascì a alludde espliçitamente a lê mæxima, in quanto acclamâ star do cinema e gioiosa incarnaçion da sessualitæ.

Decisa comonque a dâ un ciu profondo spessô a-o so lao de attrixe, a M. a se recò into 1955 a New York pe seguî e leçioin de Lee Strasberg a l' Actors Studio. A vosse inoltre dâ vitta a una propria casa de produçion co-o fotografo de modda M. Greene, interrompindo o contratto co-a 20th Century-Fox ch'o gh'imponeiva de parte conscideræ riduttive e umiliante. A major a fu coscì costreita a concedighe un nœuvo contratto ch'o l'impegnava a giâ quattro film in sett'anni consentindoghe de approvâ i copioin e de laoâ con di registi che incontressan o so favô. O primmo exito de questo accordio o fu Bus stop (1956; "Fermâ d'aotobus") de Joshua Logan, o risurtao ciu personâ e sen da carrea de l'attrixe e a convinçente dimostraçion da so capaçitæ de sfumâ i træti comichi inte una dointe umanitæ ("quarcosa tra Chaplin e James Dean", F. Truffaut, Les films de ma vie, 1975; trad. it. 1978, p. 157). Træto da una pièce de W. Inge, ma modellao da-o sceneggiatô George Axelrod in sce-a personalitæ da M., o film o risurta impreçioxio da-a so totâ inmæximaçion inta doçe ballæña Chérie, da-o patetico e scarso talento, proiettâ verso Hollywood da un sœunno imposcibile, costreita a exibise inte di locæ de infimo ordine e segnâ pe a stancheçça da un innaturâ pallô. Frattanto o so nœuvo ligamme co-o commediografo Arthur Miller o l'aveiva suscitao o morboso interesse da stampa pronta a ironizzâ in sce l'amô tra o brillante intellettuâ e a diva, coscì comme a l'irrideiva i tentativi de l'attrixe de çimentase inte de parte ciu impegnative. Perseguitao da-a Commiscion McCarthy e privao do passaporto, Miller o poe' invece seguî a M. in Inghiltæra in sce-o set do so film The prince and the showgirl (1957; "O prinçipe e a ballæña") de Laurence Olivier, in quante l'eco do matrimonio fra i doi o fu tâ che i aotoritæ no oson dividde a famosa cobbia. I rapporti no façili con Olivier (ascidiao da a presença da nœuva meistra de reçitaçion de l'attrixe, Paola Strasberg) e l'affiorâ de primme incomprenscioin con Miller peson in sce-a M., che pù a l'appâ luminosa inte l'animâ l'ennexima figua de ballæña in grao de conquistâ co-o so vivaxe candô o freido rezente de Carpaçia (interpretao da-o mæximo Olivier).

Fu però solo doppo doi anni trascorsci tra de devastante crixi personæ ch'a poe' tornâ a reçitâ in sce-o grande schermo, diretta torna da Wilde. Se o risurtao o fu o caodoeuvia da commedia Some like it hot (1959; "A quarchedun o ghe piaxe cado"), farça vivaxe, inte un gianco e neigro ricco e pastoso, de l'America do proibiçionismo e do cinema di gangster, a laoaçion a risurtò drammatica pe i cronichi ritardi de l'attrixe, e so poiie, e improvvise amnexie. A-o mæximo tempo mai ea apparsa coscì evidente a so estremma padronança di tempi commichi (ch'a ghe varse un Golden Globe e a ghe vegne riconosciua da-o mæximo Wilder) comme into dâ vitta a-a deliçiosa sunaixe de ukulele Sugar Kane, vittima prediletta de sassofonisti sença scrupoli e de troppi alcolichi, ch'a canta con irrescistibile sex appeal I wanna be loved by you e co-a so sola presença a rende ancon ciu paradossâ a situaçion di doi jazzisti de quart'ordine (Tony Curtis e Jack Lemmon) costreiti a finzise donne pe sfuzzî a morte segua in quante testimonni invoentai a Chicago da famigerâ stragge de San Valentin. Into film succescivo, Let's make love (1960; "Femmo l'amô"), una garbâ commedia muxicâ diretta da George Cukor, l'attrixe a fu asciancâ da un affascinante Yves Montand co-o quæ a l'ebbe un flirt ampiamente pubbriçizzao da-a major. Ma l'appuntamento tanto atteiso, carego de aspettative e in sce-o quæ drammaticamente se riverberon i tragichi eventi succescivi, o fu quello con The misfits (1961; I spostæ) diretto da Huston sciu scenezzatua de Miller. In questo universo maschî ciutosto convençionâ, into quæ di cowboys moderni son costreiti a cacciâ cavalli destinæ a diventâ çibbo pe chen, o personaggio ciu reâ e intenso, perturbante co-a so emotivitæ esploxiva e vosciuamente costruio pe mette a nuo a senscibilitæ de l'attrixe, o l'è proprio quello de Roslyn, a-o quæ a M. a l'aderì sença difeise, portando a-e estremme conseguençe o 'mettodo' strasberghian e rivelando una bellezza improvvisamente sofferta, splendidamente cugeita da-o gianco e neigro de Russell Metty.

A morte de Clark Gable (interprete do film e poæ immaginaio de l'attrixe inti so sœunni da figgiœua) poco doppo a fin de ripreize e o divorçio da Miller getton a M. inte una spirâ de deprescion e i meixi succescivi fun marcæ da un inarrestabile mâ de vive de fronte a-o susseguise di eventi. Tra questi, o ricovero avvegnúo a-i iniçi do 1961 a-o Payne-Whitney de New York, un uspiâ pe maotie mentæ, subio comme una devastante prexonia e da-o quæ a saiæ sciortia pe l'intervento de DiMaggio. O tentativo de riprende a reçitâ con Something's got to give, pe a regia de Cukor e da-a rente a l'amigo Dean Martin, co-e splendide foto de nuo scattæ in sce-o set a-i bordi da pisciña, inte quæ l'attrixe a pâ offrîse inte un'urtima gioiosa reisa de lê a-o mondo intrego. L'abuso de farmachi, e continue assençe durante a laoaçion do film, compreisa quella famosa do 19 mazzo 1962 pe cantâ comme una popoña vœua Happy birthday a-o Madison Square Garden in ócaxon do compleanno do prescidente John F. Kennedy. I ciacciaræ rapporti con quest'urtimo e quelli presunti co-o fræ de lê, Robert. Infin o liçençiamento da-o set da parte da Fox e, de fronte a l'oppoxiçion de Dean Martin, a decixon de riassumme l'attrixe.

O clamô suscitao da-o presunto suicidio o fu tâ che immediatamente fun avançæ e ipotexi ciu despæge, compreisa, ciu tardi, quella de l'omicidio, co-ina coixitæ e una psicoxi da isteria collettiva che provocon un destacco sempre ciu profondo da-a tormentâ individualitæ da donna, divegnua suggestiva fonte de inspiaçion pe artisti oltre che inesaoribile 'caxo giornalistego'. Sciu de lê de fæto inti anni no s'è mai cessao de scrive: da-o dramma de Miller After the fall (1964) a-o romanzo Blonde (2000) de J.C. Oates. Passando pe i versci de l' Oración por Marilyn Monroe (1965) scrita da-o poeta nicaraguense E. Cardenal e pe e belle pagine dedicæghe inte Muxic for chameleons (1975) da T. Capote che, into ricordâ un pomeriggio trascorso con lê into 1955, o-a descrive comme una "belliscima figgiœua" da-e mille insegueçe e da-o lenguaggio spesso sboccao, capaxe però de risponde con disarmante dô a un passante ch'o ghe conseggiava de no toccâ di chen sconosciui: "I chen no m'adentan mai. Solo e persoñe" (trad. it. 2000, p. 239).